مواضيع اخرى:
كرات اللحم 😆 بالثوم و القرفة مع صوص الطماطم .. طريقة مختلفة شوية بس طعم القرفة و الثوم مع اللحمة كان حلو اوي … الوصفة سهلة و خفيفة جدا و ممكن تتقدم مع رز او مكرونة (السعرات المكتوبة من غير رز او مكرونة)
📝 المقادير
– ٢٠٠ جرام لحمة مفرومة نسبة الدهون ٥% (الوزن قبل التسوية)
– بيضة
– نص بصلة مفرومة و متصفية
– م ص قرفة
– ٤ فصوص ثوم
– ٢ م ص دقيق شوفان
– ١ طماطم
– م ك صلصة طماطم
– زعتر ناشف
– ١٠٠ جرام جبنة قريش
– ملح و فلفل اسود
👨🍳 الطريقة
– هنخلط اللحمة مع البصل و البيض و دقيق الشوفان و نتبلهم بالملح و الفلفل الاسود
– هنضيف القرفة و الثوم و نخلط كويس
– نشكل الخليط على شكل كور متساوية و نحطها في صينية عليها ورقة زبدة و ندخلها في الفرن على درجة حرارة ٢٠٠ .. مش هنسيبها تستوي على الاخر (تقريبا لمده ١٥- ٢٠ دقيقة)
— يلا نجهز الصوص
هنضرب الطماطم في الخلاط و نضيف عليها معلقة الصلصة و الملح و الفلفل و شوية الزعتر (الزعتر هيديها طعم حكاية) .. بس كده 😃
– نرجع لللحمة و نشيلها من الصينية و نحطها في صينية تانية و نحط عليها صوص الطماطم و قطع الجبنة القريش و نرجعها الفرن تاني لحد مالجبنة القريش تسيح ..اه بتسيح 😃.. و اللحمة تكمل سواها .. تقريبا ١٥ دقيقة
– بس كده و ألف هنا
.
.
🔥 السعرات الحرارية للوجبة ٤٦٥ و فيها
— ٦٣ جرام بروتين
— ١٥ جرام نشويات
— ١٧ جرام دهون
